ركضوا كلُّن وقالوا هيدا الزلمي يمكن مات، وأنا ما صرلي شي، انخزقت البدلة شوي.

كنّا شباب ومندفعين، وكل واحد حمل سلاح وركض.

كانوا الناس متل الجراد، كلّ واحد كان يروح عا منطقة.

خسارة الأب بتسبّب الانكسار لأن الأب هوّي أساس البيت.

حسّيت بشي مش طبيعي بصدري، فرحت عند الحكيم واكتشفت إنّه مرض خبيث.

قمنا على شو خبرية، إنُّه بدّن يفوتوا يقتحموا النبعة ويدبحوا العالم.

بعلمي ما في شي، بس إمشي عالطريق تنزل القذيفة يا قدّامي يا ورايي.  

الشمس ما توصل لعنّا، وصوت الطيران والقنابل هوّي الوحيد اللّي نسمعُه.

كنت دقّ الكبة عالبلاطة، وتجي جارتي الأرمنيّة تقلّي: شو طيّب الأكل من تحت ديّاتِك.

كنا نضوّي الشمع، وأوقات نخاف نضوّي شمعة مشان ما يقصفونا.

كان بيتنا عا خطوط التماس. ومن ورا الحرب انتقلنا عا منطقة غير لنعيش فيها.

بقبرص الحياة حلوة، والولاد مبسوطين، كلّن بالمدارس، اضطرّينا نحطّن بالمدارس عا أساس إنّن بيتسلّوا شوي.

أقسى شي عاشته عيلتي كان فقدان خيّي اللّي مات بسبب القصف، وهالشي ولا يمكن يتعوّض

أزمات بنزين، أزمات غاز، ويصير في احتكار وغلا بالأسعار، بس كان في مصاري مع العالم.

جاري المسلم اهتمّ ببيتي، وقفّل البواب لمّا حاول الحراميّة يسرقوا بيتي.