بناية يعقوبيان

إسمي سليمان يوسف يوسف، مواليد برج حمّود ــ سنّ الفيل سنة 1960.

كنّا أنا وعيلتي محاصرين بمنطقة النبعة بالحرب بين 1975 و1976. بحرب السنتين طلعنا منها ورحنا عالأشرفيّة، ومن الأشرفية رحنا عالمنطقة الغربيّة. هونيك كان في قنّاص عالمتحف، وتعذّبنا كتير كتير. كنت رح إنخطف بمنطقة المتحف لأنّي كنت عم أعبر من الشرقيّة للغربيّة. كانت الحرب ولعانة بين الإسلام والمسيحيّة. محل ما كانوا المسيحيّين بالمنطقة الشرقيّة كانوا رح يخطفونا، ولو انخطفنا كنّا رح نصير أسرى أو نموت.

يلّي أنقذنا هوّي السيّد موسى الصدر، كان بالأشرفيّة وقطّع الناس من النبعة للمنطقة الغربيّة عبر اتفاقيّة. كان السيّد موسى بعدُه عايش سنة 1976، وكان في حالات خطف كتير.

رحنا عالغربيّة أخيرًا، ومن بعدا رحنا عا منطقة الروشة وسكنّا ببناية “يعقوبيان”. قعدنا  هونيك والمنطقة الغربيّة صارت تساعدنا لأنّا كنّا مهجّرين من النبعة. طبعًا كانت معي عيلتي كلّا، إخوتي الكبار والصغار وأهلي. هيدا الشعب اللبناني صاحب النخوة اللي تعوّدنا عليه وهيدي قصتي.