أقوى من المرض

المصايب ما بتجي وحدة وحدة… بتجي مع بعضا. واللّي صار معي، بيبرهن إنّه هالقول صحيح ومَنُّه عبثي. بس بالإرادة القويّة، والإيمان والعزم… منقدر نتغلّب عالمصايب كلّا. إن إجت وحدة وحدة… أو مع بعضا.

إسمي…. ساكنة بمنطقة… 

كانت إيّام حرب وضرب، وكنّا عايشين كلّ يوم بيومُه، قصف وقذايف وضرب وملاجئ. كان عندي تلات ولاد صغار، إحملُن وإحملُّن غراضُن ونزّلُن عالملجأ. وبس يخلص القصف نرجع نطلع.

وفي نهار، حسّيت بشي مش طبيعي بصدري، فرحت عند الحكيم واكتشفت إنّه مرض خبيث ولازمُه عملية وعلاج. وهون بلّشت عيش حياة خوف ورعب، لأنّه من ميلة عندي تلات ولاد صغار، ومن ميلة حرب وضرب. وصرت فكّر إذا صرلي شي شو بدُّن يعملوا لحالُن بلا إم بهالأوضاع الصعبة والخطرة، وكيف بدُّن يعيشوا.

من بعد ما بكيت كتير، فكّرت إنّه الخوف والبكي ما رح يعملولي شي، ولا رح يشفوني، ولا رح يساعدوني. قرّرت كون قويّة كتير لإتخطّى هالمرض، وإرجع لولادي وعيلتي. قوّيت إيماني بالله، وحطّيت براسي إنّي بدّي كون أقوى من المرض وبدّي إغلبُه لإرجع لولادي. رحت عند الحكيم وبلّشت بالعلاج يللّي كان صعب ومتعب، وخصوصًا مع أوضاع الحرب ومع تلات ولاد زغار. وبفضل إرادة الله وقدرتُه الإلهية وإيماني وقوتي، قدرت إتغلّب عالمرض وشفيت منُّه وعشت وبقيت مع ولادي وشفتُن عم يكبروا، وجوّزتُن وشفت ولادُن كمان.

بنصح الجيل الجديد إنّه أهم شي لازم يكون عندُه عزم وإيمان وقوّة، لإنّه بقدرة الله وبقوّة الإنسان وإرادتُه، بيقدر يتخطّى كلّ الأزمات ويتغلّب عا كلّ الصعاب، ويحقّق كل أهدافُه.